Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Омск облазынга ажыл-агыйжы сургакчылаашкын үезинде чорааш, чайгы кампания-биле чаагайжыдылга чоруп турар «Омскунуң чүрээ» деп чаа шөлге барган.
Анатолий Серышев регион баштыңы-биле Блинов аттыг спорт-концерт комплекизиниң чанында «Омскунуң чүрээ» деп чаа сесерликти эргий кылаштааннар. Комплексти улуг хемчээлдиг чаартылга соонда бо чылдың март айда ажыткан. Виталий Хоценко Анатолий Серышевке чаагайжыдылга ажылдары дооступ турарын дыңнаткан.
Паркта культурлуг хемчеглер болгаш спортчу маргылдаалар дамчыдарынга улуг экранныг амфитеатрны кылган.
Шимченгир дыштанылгага ынак улуска падел, стритбол, пляж волейболу, стритлифтинг, йога болгаш танцылаар шөлдерни аңгы дерээн. Оон аңгыда селгүүстээр шөлдер, уруглар ойнаар шөл база улуг делгем соңгаларлыг кафени база туткан. Девискээрни чадар сиген-биле шып, чечектерни, ыяштарны тарып, ногаажыткан.
Төлевилел езугаар сесерликтиң хөй-ниити девискээрин бүдүн чыл дургузунда ажыглаар кылдыр туткан – хоорайның чурттакчылары болгаш аалчылары чылдың кайы-даа үезинде ооң инфраструктуразынга дыштаныр аргалыг.
«Омск хоорайның чурттакчыларының херек кырында хереглелдерин барымдаалап, үр үеде ажыглаар кылдыр чаагайжыды туткан амгы үениң хөй-ниити шөлдери хамаатыларны хаара туткан черлер апарып, хоорай хүрээлеңин сайзыраңгайжыдырының үндезини болу бергенин тодаргай көргүзүп турары – төлевилелдиң чедимчелиг боттаныышкыны-дыр» - деп, Анатолий Серышев түңнээн.