1925 чылдың август 31-де үнүп эгелээн

ХЕВИС КЫРЫНДА ИЗИГ-ИЗИГ...

Россияның Камгалал сайыдының Кубогу дээш спортчу хүрешке Бүгү-ар­мейжи маргылдаалар «Хүреш» стадионда дүүн эгелээн. Маргылдаада российжи армияның шериг округтарының спортчулары киржип турар.

Бүгү-армейжи маргылдааларның хүндүлүг аалчыларының аразында Армияның Төп спортчу клувунуң (ЦСКА) начальниги, хөй хевирлерниң шериг спортунга Россияның спорт мастери, полковник Артем Громов, грек-рим хүрешке 2004 чылда олимпий оюннарының чемпиону Алексей Мишин, грек-рим хүрешке Европаның ийи дапкыр чемпиону, делегейниң ийи дапкыр чемпиону, олимпий оюннарының тиилекчизи, Хүндүлелдиң демдээ болгаш Найырал орденнерниң эдилекчизи Вартерес Самургашев, ССРЭ-ниң алдарлыг спорт мастери, Россияның алдарлыг спорт мастери, хостуг хүрешке 1983 болгаш 1985 чылдарда делегейниң ийи дакпыр чемпиону, 1977 чылда Европаның чемпиону Виктор Алексеев олар бар. Бүгү делегейге Россияның спортчу ат-алдарын төлептии-биле камгалап чораан ат-алдарлыг спортчуларның Тываның найысылалы Кызыл хоорайда болуп турар Бүгү-армейжи маргылдааларга аалдап келгени Россияның Камгалал са­йыды Сергей Шойгуга улуг хүндүткелдиң демдээ-дир.

Армияның Төп спортчу клувунуң (ЦСКА) начальниги, хөй хевирлерниң шериг спортунга Россияның спорт мастери, полковник Артем Громов-биле Тываның Баштыңы Шолбан Кара-оол ужурашкан. Россияның чыын­ды командазының сос­тавынга тыва спортчуларның медицина хайгаа­ралының төвүн тургузарының дугайында олар чугаалашкан. Хостуг хүреш, спорттуң дайынчы хевирлери республикада дыка нептереңгей, а классиктиг хүрешке аныяктар шоолуг хандыкшывайн турар. Ынчангаш хүрештиң бо хевиринге мастер класс­тарны эрттирерин Артем Громов-биле Шолбан Кара-оол дугурушкан.

Бүгү-армейжи маргылдааларның байырлыг ажыдыышкыны дүүн кежээ «Хүреш» стадионга болган.

Ол хүн хевис кырынга сегиржип алыышкыннар изиг-изиг эрткен. Чүге дээрге бөлүктер аайы-биле долгандырыг хүрешке тиилээннер маргылдааның кол шаңналы Россияның Камгалал сайыдының кубогу дээш бөгүн чаныш-сыныш чок хүрежирлер.

Бүгү-армейжи спортчу хүреш маргылдааларын интернет четкизинде, Кызыл хоорайның төвүнде, Ленин кудумчузунда LED-экранда дамчыдып турар.

Бистиң корр.

Арслан АРАКЧААНЫҢ

 тырттырган чуруктары.

Рубрика: 

Санал-онал немээри

Image CAPTCHA
Enter the characters shown in the image.