1925 чылдың август 31-де үнүп эгелээн

МООЛЧЕ СУРГАКЧЫЛААШКЫН

Тываның Баштыңы Шолбан Кара-оол май 13-те Моолдуң төвү Улан-Баторда чеде берген. Ону Россия Федерациязының Моолда Онза болгаш Бүрүн эргелиг төлээзи Искандер Кубарович Азизов уткуп алган.
Дүүн, понедельникте, Тываның Баштыңы Гандантэгчинлен хүрээзинге барган соонда, Моолдуң Күрүнениң Улуг Хуралының кежигүнү, «Россия-Моол» парламентилер аразының бөлүүнүң удуртукчузу дээрги Б. Энх-Амгалан, Моолдуң даштыкы харылзаалар сайыды дээрги     Д. Цогтбаатор, орук сайзыралының болгаш транспорт сайыды дээрги Ж.Бат-Эрдэне олар-биле ажыл-херекчи ужуражылгаларны кылган.
Моолдуң президентизи дээрги Хал­тмаагийн Баттулга биле Тываның Баштыңы Шолбан Кара-оолдуң ужуражылгазы Күрүне ордузунга эртер.
Тывадан барган албан ёзунуң делегациязында «Россчеткилерниң» тө­лээлеринден аңгыда Чазак кежи­гүн­нери, Дээди Хуралдың депутаттары, тыва сай­гарлыкчылар бар.
«Моолдуң президентизи дээрги Баттулга-биле сентябрьда ужуражылгавыс үезинде бистиң идеяларывыстың дорт күүседикчилери-биле кады чугааны улам­чылаарын дугурушкан улус бис. Российжи электри энергиязын барыын Моолче  үндүр дамчыдарының аргазы ийи талага хөлчок ажыктыг бооп турар – деп, Тываның Баштыңы Шолбан Кара-оол чорук-херээниң мурнунда сагындырып чугаалаан. – Красноярск – Кызыл – Хандагайты – Улангом – Ховд – Урумчи аразының автомобиль оруунуң төлевилелин быжыр ажылдап төндүреринге чедир эвээш эвес үе арткан боор деп санап турар мен. Аргалыг болза Улан-Батор – Кызыл аразынга авиа-харылзаа тударынга сонуургалдыг авиа-сөөртүкчүнү тып ап, Тыва девискээ­ринге эът болбаазырадыр бүдүрүлгени демнежип ажыдарын дугуржур бис».
Тываның Баштыңы ол ышкаш Моолдуң бойдус, долгандыр хүрээлел болгаш туризм сайыды дээрги Н. Цэрэнбат, Моолдуң энергетика сайыдының оралакчызы Т. Гантулга, камгалал сайыды дээрги Н. Энхболд, Моолдуң Национал сайзырал агентилелиниң болгаш «Northern Railways» компанияның удуртулгазы-биле ужуражыр планныг.
Моолга ажылчын сургакчылааш­кынының үезинде Тываның Баштыңы Моолдуң Төп болгаш Чөөн-Гоби аймактарынга чедип, «Mongolyn Alt Corporation» (МАК) компанияның үлетпүр объектилерин көөр.
 Тываның Баштыңын тыва актер Эдуард­ Ондарның киржилгези-биле «Гобиниң тоолчургу маадыры» деп кинону тырттырган «UBS» телекомпания интервьюже база чалаан.  
Тываның Баштыңының парлалга албаны.

Санал-онал немээри

Image CAPTCHA
Enter the characters shown in the image.